Հայաստանում Իրանի դեսպան Մեհդի Սոբհանին այսօր Մամուլի ազգային ակումբում հրավիրված հանդիպման ժամանակ պահանջեց, որպեսզի «Ազատություն»-ը հեռանա սրահից՝ սպառնալով՝ այլապես ինքը կլքի տարածքը:
Մամուլի ազգային ակումբի նախագահ Նարինե Մկրտչյանը դեսպանին բացատրեց, թե նա կարող է «Ազատության» հարցերին չպատասխանել, բայց լրագրողին դուրս հանել չեն կարող:
«Մամուլի ազգային ակումբը լրագրողական այն կազմակերպությունն է, որտեղ բոլոր լրագրողների իրավունքներն են պաշտպանում, հարցերին պատասխանել - չպատասխանելը Ձեր իրավունքն է» ,- ասաց Մկրտչյանը:
Դեսպանն ի պատասխան ասաց, թե հասկանում է, բայց նորից պնդեց, որ «Ազատություն»-ը լքի դահլիճը:
«Եթե այստեղ լինի, ես կգնամ», - ասաց նա:
Նարինե Մկրտչյանը կրկին նշեց, որ լրագրողին դուրս հանել չեն կարող՝ խնդրելով սկսել հանդիպումը և չբարդացնել իրավիճակը:
«Ես չեմ մասնակցի»,- ասաց դեսպանը և դուրս եկավ սրահից:
Որպեսզի Մամուլի ազգային ակումբի հրավիրված հանդիպումը չտապալվի, որոշեցինք դուրս գալ սենյակից: Երբ դեսպանին տեղեկացրին, որ «Ազատություն»-ը հեռանում է, Մեհդի Սոբհանին կես ճանապարհից վերադարձավ:
Երբ մենք հավաքում էինք մեր իրերը, դեսպանը կոշտ ձևով կրկին պահանջեց, որ դուրս գանք՝ ճշտելով՝ արդյո՞ք օպերատորը նույնպես լքել է սրահը: «Ազատություն» ռադիոկայանը հիշեցրեց դեսպանին, որ անցած տարի հենց ինքն էր բացառիկ հարցազրույց տվել «Ազատությանը», որտեղ արտահայտել էր իր բոլոր մտքերը՝ նույնիսկ ԱՄՆ-ի հասցեին հնչեցնելով ամենասուր քննադատությունները:
Օրեր առաջ էլ ներկա ենք եղել դեսպանատանը Մեհդի Սոբհանիի հրավիրած ասուլիսին, որտեղ նա առանց որևէ վերապահման պատասխանել էր «Ազատության» բոլոր հարցերին:
Ի պատասխան դեսպանն ասաց, թե օրեր առաջ տեղ ունեցած ասուլիսին թույլ չէր տա ներկա գտնվեինք, եթե իմանար, որ մենք էլ ենք այնտեղ: Ինչ վերաբերում է իր նախաձեռնությամբ տված հարցազրույցին, ապա իրանցի դիվանագետն ասաց, թե այո, բարի կամք են դրսևորել, և հարցազրույց է տվել:
«Բայց հիմա դուք մեր թշնամիների համար եք աշխատում»,- ասաց դեսպանը: