Ռուսաստան-Ուկրաինա պատերազմի կարգավորման բանակցությունների ընթացքը կախված է երեք հիմնական գործոնից՝ Կիևի դիրքորոշումից, ԱՄՆ-ի միջնորդական ջանքերի արդյունավետությունից և իրավիճակից տեղում։ Այս մասին կիրակի օրը հեռարձակված հարցազրույցում ասել է Կրեմլի խոսնակ Դմիտրի Պեսկովը։
«Շատ բան կախված է Կիևի ռեժիմի դիրքորոշումից», - ասել է Պեսկովը, - «Կախված է նաև, թե որքան արդյունավետորեն կշարունակվեն Վաշինգտոնի միջնորդական ջանքերը»:
Պեսկովը չի մանրամասնել, թե կոնկրետ ինչ է Մոսկվան ակնկալում ԱՄՆ-ից կամ Կիևից։ Ռուսաստանը նախկինում պահանջել է Ուկրաինայից հանձնել նոր տարածքներ և հրաժարվել Արևմուտքի ռազմական աջակցությունից՝ պայմաններ, որոնք Կիևը համարում է անընդունելի։
Թեև բանակցությունների հաջորդ փուլը դեռ նշանակված չէ, Պեսկովը նշել է, որ Ռուսաստանը հույս ունի, որ «մոտ ապագայում» դա պարզ կդառնա:
Թուրքիան, որը հյուրընկալել էր նախորդ բանակցությունները, ուրբաթ օրը հայտարարել է, որ պատրաստ է նորից ընդունել կողմերին։
